I: Cześ.
J: Skōnd wracŏsz?
I: A byłach na cmyntŏrzu. Tak sie to gŏdŏ?
J: Ja, może być. Ale może tyż być na smyntŏrzu. Abo na kyrhofie.
I: A ja, słyszałach kejś te słowo.
J: I dŏwałaś tam kwiŏtki?
I: Jŏ na Wszyjskich Świyntych dŏwōm take raczyj wiōnzanki.
J: Ja, terŏzki wszyńdzie take robiōm. A kejś były zŏwdy wiyńce. Nawet jak w drugich regiōnach były już wiōnzanki, to sam na Ślōnsku dŏwało sie wiyniec.
I: A ludzie kupowali? Czy robiyli to sami?
J: Niykerzi robiyli, ale my w mojij familiji zŏwdy ino kupowali. Take fajne były kejś z liści dymbu.
I: A kwiŏtkōw niy dŏwaliście?
J: Ja, dŏwali, zŏwdy żywe. Na Wszyjskich Świyntych to były dōmbki.
I: A co to je? Przecã niy mały dōmb!
J: Nō, ale śmiyszne! Nic ino sie lachać! Dōmbek to chryzantymy. Ponoś take do blumwazy tyż, ale u mie w dōma dōmbek sie gŏdało ino na take we blumtopie, znaczy sie we dōniczce.
I: I świyczki pŏlyli.
J: Ja i wszyjscy mieli radzi łazić na smyntŏrz na wieczōr. Bo sie nad smyntŏrzami robiyła fest jasnŏ łuna.
I: Terŏzki niy ma tyj łuny, bo wszyjske znicze majōm te… przikrywki?
J: My by pedzieli dekle, dekelki.
I: I to je lepij, że majōm te dekelki, bo kejś jak ich niy było, to czasym ôd płōmiynia ze świyczki…
J: Możesz pedzieć ôd flamy.
I: Ja, ôd flamy kejś sie…
J: Chytały?
I: Ja, toch miała na myśli. Chytały sie kwiŏtki i wiyńce.
J: I z tego mōgła być jest fojera.
I: Czasym tak sie robiyło.
J: Znaczy sie te ôtwarte świyczki miały fajne i złe strōny. Bo prziznŏsz, że ta łuna nad smyntŏrzami była gryfnŏ.
I: I wiysz, dzisioj, to fest mōm rada, że dbajōm ô ludzi, co idōm na smyntŏrz.
J: W synsie?
I: Że banki i autobusy jadōm za darmo. Niy potrzeba brać auta, bo ciynżko je zaparkować.
J: I jak sie wylezie ze banki to blank prosto na budy ôdpustowe.
I: Kupujesz tam co?
J: Ja. Wiym, co to trochã gupie przed smyntŏrzym, ale jŏ fest mōm rada kartofelki ze marcypanu i makrōny.
I: Niy dziwota. Ślōnske maszkyty sōm przecã maszkytne.
GRAMATYKA – LEKSYKA
Dzisiejsza lekcja była lekcją leksykalną i realioznawczą. Mówiłyśmy o śląskich obyczajach związanych z uroczystościami Wszystkich Świętych.
